He pūrongo i whakaritea mā Te Mātāwai, e Te Wāhanga - Te Rangahau Mātauranga o Aotearoa, i te tau 2018.
I tonoa Te Wāhanga—Te Rangahau Mātauranga o Aotearoa e Te Mātāwai, ki te whakaemi i ngā mōhiohio, hei āta whakatakoto i te kohinga whakaaturanga o ngā huarahi e whāia ana i ngā kāinga me ngā hapori, mō te whakarauoratanga o te reo Māori.
Ko tētahi patapatai ā-ipurangi i roto i ngā reo e rua te huarahi matua i whāia ai ki te whakaemi i ngā mōhiohio e pā ana ki ngā kaupapa whakarauoratanga o te reo Māori i whakapuakihia ai i te tau 2016, i te tau 2017 rānei, tae atu ki ngā wānanga reo, ngā huihuinga inu kawhe me te kōrero, ngā ahurei, ngā waiata, me ngā huihuinga ā-kaupapa. Ko te nuinga o ngā kaupapa whakarauoratanga reo Māori i arotahi ki te whakatairanga ake i te āheinga o te hunga ki te whakamahi i te reo Māori, mā te noho kanohi ki te kanohi. I hāngai ngā kaupapa maha ki ngā whāinga mō te whakarauoratanga o te reo Māori, arā, ki te whakapakari ake i ngā āheinga o te hunga ki te whakamahi i te reo Māori, ki te whakapiki ake i te whakamahinga whitawhita o te reo, ā, ki te whakawhānui ake i ngā kupu, i ngā karakia, ā, i ngā tūāhuatanga reo katoa e mōhiotia ana.
I whakaemihia ngā mōhiohio mō ngā rauemi reo Māori i whakaputaina ai, mai i te Kohi-tātea o te tau 2012, ki te Hakihea o te tau 2017, arā, ki ngā rauemi ā-ipurangi, ngā rauemi i tāngia ai ki te pepa, ki te ipurangi rānei, me ngā piri-pepa, ngā pānui whakaahua, ngā hopunga puoro, ngā ataata rongo, me ngā kōnae rorohiko. Ko ngā rauemi i tāngia ai ki te pepa te tūmomo rauemi i kaha whakaputaina ai, ā, he maha ngā rauemi i whai pānga nui ki te whāinga whakarauora reo ki te whakapiki ake i te whakamahinga whitawhita o te reo Māori.
I te mutunga o te Haratua, o te tau 2018, kei te huinga raraunga o He Reo Ora ngā:
- tāuru raraunga motuhake e 498, e whakamārama ana i ngā kaupapa whakarauora reo Māori i tū ai i te tau 2016
- tāuru raraunga motuhake e 579 e whakamārama ana i ngā rauemi reo Māori i whakaputaina ai, mai i te tau 2012 ki te tau 2017.
Kua kapohia atu ki te pūrongo nei, ko ngā kaupapa whakarauoratanga o te reo Māori, me ngā rauemi reo Māori i te motu me ngā rohe, tae rawa atu ki te whānuitanga tonu o ngā pūtea mō te whakarauoratanga o te reo Māori.