Ka tirohia e tēnei rangahau te mana motuhake—te oranga, te akoranga me te ārahitanga—i roto i te mātauranga kaupapa Māori. He mea tō mai i ngā kōrero o ngā Pou Māori nō ngā kura e whā—Te Kura Māori o Ngā Tapuwae, TIPENE, Kia Aroha Campus, me Te Kura Māori o Porirua—ka whakaatu atu te rangahau nei i te rerekētanga me te tūhonotanga o ngā tirohanga rerekē o te kaiārahitanga.
I hua mai ngā kitenga i ngā pūkōrero o ngā tumuaki, ākonga, ākonga-ō-mua, whānau anō hoki, arā, ko te kaiārahitanga i roto i te mātauranga o te kaupapa Māori he mahi ngātahi, ā, ka whai pānga ki te katoa. Ko te whanaungatanga, te aroha me te whakapapa te tūāpapa. Ka whakapuaki tēnei rangahau i te whakatinanatanga o ngā kura i te mana motuhake mā te whakarauora i te reo, te titikaha ki te tuku iho mā te reanga, te arotahi ki te tuakiritanga me te tautīnei i ngā mahi āhuatanga Māori.
Ka aro ia tauira rangahau ki ngā mahi o ia kura hei whakawhanake i te māiatanga o ngā pou Māori, hei kaiārahi whai hononga ki o rātou iwi, hapū, whānau anō hoki. Ka tautoko hoki i a rātou kia ārahi i roto i te ao Māori, ōtira tae atu ki te ao whānui.
Kitenga matua:
- Ko te kaiārahitanga he mahi ngātahi—i tipu mā te tautoko, te whakatauira me te toha haepapa.
- Ka noho mā te mahi te kaiārahitanga e whakatinana—ka whakaatu mai i roto i ngā mahi o ia rā.
- Ko te mana motuhake te tuāpapa—nā te reo, tikanga, kawatau anō hoki, me te motuhaketanga o te ako.
- Ko ngā whānau he hoa haere—puta noa i ngā reanga, me te maha o ngā tangata ka hoki atu ki te kura hei kaiako.
- Mā te Māori te angitūtanga e whakamārama mō te Māori—He ōrite te tuakiritanga ki te whakatutukitanga, he hononga ki waenganui i ngā mea e rua.
Ko tā te mātauranga o te Kaupapa Māori he poipoi i te mana motuhaketanga, mā te whakarite āhuatanga e tipu ai te kaiārahi kia hono atu ia ki te ao Māori. He wāhi ako ēnei kura, he "kāinga rua”, he whare wānanga, he “sites of transformation”. Ko rātou te whakatinanatanga o te tino rangatiratanga.