Ko te pūrongo tuatahi tēnei mai i tētahi kōkiri rangahau kaupapa Māori 3-tau te roa (2012–2015) e tūhura nei me pēhea te tino tautoko i te tupuranga tonutanga o te whanaketanga reo Māori o te whānau, i a rātou e whakawhiti nei i te kōhanga reo, ki te kura kaupapa, ki te wharekura, ki tua atu hoki. Ko tōna whāinga he hora mōhiotanga whai take mō ngā whiringa akoranga reo Māori ka tino whai hua pea, mō te tutukitanga o ngā wawata reo Māori o te whānau.

E whakahaeretia ana tēnei kaupapa e Te Wāhanga, te pūtahi rangahau Māori o Rangahau Mātauranga o Aotearoa (NZCER). Ka puta te tuarua o tēnei rangatū pūrongo hei te tau 2014, te tuatoru hei te tau 2015.  

Kei tēnei pūrongo ētahi mōhiotanga me ngā pātai taketake mō te whanaketanga reo mā te whānau, kei ia hipanga o te hātepe whakatau take, mai i ngā whiringa kōhungahunga, ki ngā āhuatanga o muri i te kura.

I whakarewaina a Ka Whānau Mai Te Reo i tētahi wānanga rā katoa i Tapu Te Ranga Marae i Hue te Taka, Te Whanganui-a-Tara, i te 9 o Whiringa-ā-nuku. Nā tēnei wānanga i wātea ki ngā whānau tētahi ara ki te tāpae pūtake taketake i roto i te akoranga mō te iwi Māori, he ara hoki hei tūhura i aua pūtake.

Image
Ka whanau mai te reo team