Ko tā te pūrongo nei he arotake i te mana tautika e ai ki te tirohanga o te kura mana motuhake, ā, ki Te Kura Māori o Ngā Tapuwae (“Ngā Tapuwae”). E ai ki a Fortune mā (2024), ko te whakapuakanga tika mō te mana tautika e ai ki te tirohanga Māori, ko te mana motuhake, ko te tino rangatiratanga rānei.
Ki te whakataurite i ngā kura mana motuhake ki ngā kura auraki, he kura kotahi noa a Ngā Tapuwae i waenga i te rahi o ngā kura mana motuhake e tutuki nei i ngā taumata teitei o ngā Taumata Mātauranga ā-Motu ka Taea (TMMT)—NCEA—ahatia ngā aupēhitanga ohapori (Gerritsen, 2024). I te tau 2023 i whakanuia a Ngā Tapuwae mō te ōrau nui o ngā tamariki kua whakawhiwhia ki TMMT i te motu whānui, ka mutu kei te eke tonu rātou ki ngā taumata kairangi mai anō i tōna wherereitanga, ā mohoa tonu nei. E whakapono nui ana a Ngā Tapuwae nā te ahurea Māori me te taiao ako torowhānui o te kura i tino eke ai ngā tamariki ki ngā taumata tiketike o TMMT.
Ko te pūtake o te tuhinga rangahau nei he whai taunakitanga ki ngā wero kua rangona, ka mutu kua kauparetia e Ngā Tapuwae kia eke ai ngā ākonga katoa ki ngā taumata i wawatatia ai e rātou mō te mātauranga.
Nā Ngā Tapuwae me te tira rangahau i ngā kaupapa Māori o Te Wāhanga i NZCER ngā pātai rangahau i
waihanga:
- He aha ngā mōhiotanga o Ngā Tapuwae ki te Tauine Tautika?
- He aha te nui o te tautoko nā te Tauine Tautika ki Ngā Tapuwae kia ea ai te mana tautika mā ngā
ākonga me ngā whānau? - He aha te hirahiratanga o te mana tautika ki Te Kura Māori o Ngā Tapuwae?
- He aha ngā rautaki ka whāia e Ngā Tapuwae ki te whakatutuki i ngā wawata ā-mātauranga?
- He aha ngā tūmomo rauemi ki te utu i ēnei rautaki? He aha hoki ngā wero ki te rapu i ēnei rauemi?